اللي في النص
مفيش نص تلمذة.. ولا نص تكريس.. ولا نص نذير.. ولا نص عروسة.
اللي في النص، مش بيطول حاجة.. فخليك واضح.. وحقيقي.
واللي في النص، غير صالح للاستخدام.. لأنه إناء معاند معظم الوقت.
والتلمذة ليها شروط، وتكلفة، وتبعات. ومالهاش علاقة بمرواحك السما.
التلمذة مهياش منهج تدرسه.. ولا كورس تحضره.. ولا شخص مشهور تتبعه.. ولا ارسالية وخدمة عظيمة تعملها.. فتبقى تلميذ.
التكريس مش لبس معين او شكل او انك تسيب شغلك او ماتتجوزش.
العالم مليان ناس مابتشتغلش او مابتتجوزش او لابسين اسود او مربيين دقنهم.. لأسباب كتير غير يسوع. فاكيد مش ده اللي شاغل ربنا.. ان ولاده يبقوا كده.. بالعكس!
التلمذة.. ترك الكل م القلب، تبعية ليسوع، حساب نفقة، وحمل صليب.
حياتك بتاعتك.. انت حر فيها.. عايز تديه حتة فقط منها.. وماتبقاش تلميذ... هايقبلها بسرور.. لو انت حقيقي.. لكن ماتكونش كذاب.. زي حنانيا وسفيرة. وتدعي حياة وماتعيشهاش.
لو قولت له عايز الكل يبقى ليك.. هايصدقك.. وياخدك على محمل الجد.. ومش هيتنازل عن أن الكل يبقى ليه. وقتها هتظهر حقيقتك.. وحقيقة صلاتك.. هتعافر وتفاصل معاه.. ولا هتسيبه يملك كيانك؟!
التكريس للرب.. مش للخدمة.. يعني لو عايز شغلتك او لقبك يبقى "خادم متفرغ" براحتك.. بس ده مش معناه إنك مكرس ليسوع.
التكريس طاعة للوصية.. بدون مناقشة.. هاتطيعها إزاي لو متعرفهاش؟
المكرس ليسوع بيسلم نفسه للروح.. عشان يرسم فيه صورة يسوع❤️
التكريس معاناة.. مستمرة.. لأنك بتتخلع من قديمك.. عشان يسوع يُستعلن فيك.. موت وقيامة كل يوم💥