فى الدنيا دى يا أبنى.. مش بناخد كل حاجة.. مش بينفع نصاحب كل الناس أو ندخل فى علاقات مع كل البشر..
عشان كده يا بنى.. مهم قوى تعرف.. مين هما.. الناس اللى ليك؟!
اه يا حبيبى.. انت مش جاى هنا عشان تكون وحيد.. أنت ليك ناس.. لكن يمكن أنت اللى بتدور فى المكان الغلط..
متهيألى الدنيا بتقدم هدية لكل شخص.. مجموعة من البشر.. يسندوه ويسندهم.. ويرافقوا بعض فى رحلة الوجود.
ناس بترتاح ويرتاحوا.. لمعية المسيرة سوا..
ناس يستحقوا أنك تنتظرهم.. لغاية أما تتوفر الشجاعة أنهم يقربوا منك.. وتقرب منهم..
يستحقوا أنتظار الوقت.. والحياة أما ترتب ظروف مناسبة للـ.. لقاء.
أما نتجاوز المخاوف.. والخجل.. والمسافات .. واوقات اما ننضج عشان فيه علاقات مايناسبهاش غير اوقات معينه فى الحياة ونضج خاص.
ناس مش خسارة فيهم.. الأنتظار.. والوقت.. لأنهم كنوز حقيقية وغالية.
ومش خسارة حتى.. انك تشتغل وتصبر على نفسك.. عشان فى يوم م الايام تقدم للأخر شخص سوى فى علاقة سوية.
بتسأل هاتعرفهم إزاى؟!
هاتعرفهم :) هايبقوا مختلفين عن علاقات الصراع اللى عشت طول حياتك فيها.. العلاقات اللى بتحاول تلصمها.. واللى بتتنازل فيها عشان الاخر يفضل موجود..
العلاقات اللى محتاجة شرح كتير.. عشان الآخريفهم أنت مين.. وفى الأخر مش بيفهم!!
هتلاقيهم جواك.. حتى قبل ما يتفتح بينكم كلام.. وكأنكم أتقابلتم قبل كده فى عصر ما.
يمكن ما يكونوش كتير.. يمكن واحد أو أتنين.. بس هايكونوا كفاية عن علاقات كتير مستنزفة.
يا ابنى.. ماتستعجلش انك يكون عندك علاقات كتير وخلاص.. العلاقات الفاضيه.. مش بتقلل الوحدة.. لكن بتزودها.. وبتخليها مؤلمة أكتر.
العلاقات شبه اللى معاه ميدالية مليانه مفاتيح.. بس ممكن تكون معظم المفاتيح دى مالهاش لزمة.. ومش بتفتح غير باب وراه فراغ.
الباب اللى ليك.. هايبدل معاك المفاتيح.. فى هدوء وأمان...