#0016

- لما حد كان بيقول رأيه فىَّ.. أو فى شىء يخصنى زى شكلى.. شغلى.. كلامى.. أفكارى.. كنت بأنزعج جداً...
وأشعر كأنى فار مزنوق فى ركن الأوضة.. والمنفضة هاتنزل على وشى تفطسنى..
وأنى لازم أدافع عن نفسى.. فأتحول فجأة لأسد.. وأهاجم اللى قدامى.. لغاية أما أعوره... وأخليه ينسحب.

وبعدين.. بقيت مجهد من ده كله.. فبقيت أسمع وأطنش.. وأضحك ضحكة بلهاء.. وأقول لنفسى كلهم هبل مش عارفينك.. ولا عارفين قيمتك..
ووقعتهم من حساباتى.. بس برضه مارتحتش.. عشان أوقات كتير.. كان بيبقى عندهم حق فى بعض كلامهم..

عارف المشكلة فين.. أنا أى نقد بالنسبة لى بأعتبره رفض لشخصى... بيهددنى جداً..
وغالباً أنا مش مستحمل مزيد من الرفض!!