خطف الروح

لو عايز تعيش وتُقاد بالروح، يبقى لازم تخضع لخطف الروح.(اعمال ٨ )

يعني تقبل انه ينقلك في أي وقت.. لأي مكان.. ولأي حالة..

الجسد يهوى الاستقرار والامور اللي بيعرف يسيطر عليها. والروح بيسلك معاك بالمجهول وبالتغيير المفاجيء ضد رغبة الجسد.. ليميته.

ياخدك من ناس ويحطك بين ناس تانية. او ياخدك من حالة الصلاة للشغل، للخدمة، والعكس. يقولك رافق الشخص ده.. متعرفش لأمتي.. واما تشوف او يشوف النور، يخطفك منه وتلاقي نفسك في مسار اخر.

ده معناه انك تعيش غريب، مش مربوط بمكان ولا بأشخاص ولا بحالة.

مفيش غريب بيضيع فلوسه في شراء اوضة الفندق.. مهما كانت جميلة، لإنه عارف انها مش بيته ولا محل اقامته. الاوضة ممكن تكون شخص او خدمة او صوم او عبادة.. او اي شكل روحي.

ماتضيعش اللي عندك في شراء حالة روحية عاجباك! اشتري يسوع ❤️

الغريب دايمًا عارف ان بيته في مكان تاني.. وانه في رحلة نحوه.

زي ابراهيم.. بتخرج معاه.. وراه.. وانت لا تعلم إلى أين تذهب! فلو لقيت نفسك عارف كل مسار الرحلة.. فغالبًا ده مش الروح لكن الجسد!

وبالتالي تقبل انه ما يكونش عندك شروط.. او توقعات.. تقبل ان اشخاص ترحل وخدمات تتقفل وتقبل برضه انه في وقت تاني يرجعك او يرجعلك بعض اللي مشي واللي ظبطت حياتك انه خلاص مش موجود. الموضوع مالوش علاقة بذاتك واحاسيسك وكرامتك لكن بمشيئة الروح. خليك مرن عشان متتكسرش بكبريائك!

تقبل كمان إن حالات روحية تتقفل وتتفتح. في فترات حياتك المختلفة. زي الصوم والصلاة والخدمة والانعزال.. ماتتوقعش ان حياتك هاتمشي على وتيرة واحدة. ومش معنى انك في وقت شبعت من خلوتك او صومك.. انك هاتفضل تاكل بنفس الطريقة طول العمر.. فلو مش عارف تاكل، اسأله.. أكل دلوقت ازاي؟ وكسر اسطمباتك.

يعني تعيش اليوم معاه.. او بمعنى اصح.. اللحظة الحالية. ومش لازم تعرف بكره (كمان شوية) هايكون ايه وفين وإزاي.. المهم إنه معاه.

يمكن ايام طويلة تعدي بصورة مملة مكررة رتيبة.. مستني السحابة تتحرك.. وكل شوية تبص عليها، تلاقيها لسه مكانها. وايام تانية يبقى كل لحظة فيها شيء جديد... وتبقى عايزه.. يبطيء شوية

تقبل كل حالاتك بالرضى، لأنها الانسب ليك، طالما هو اللي وضعك فيها.

تقبل انه خلاص فيه شخص تاني بيسوق عربيتك.. شخص الروح.. يحملك الى حيث تشاء والي حيث لا تشاء... المهم تفهم انك محمول ولست الحامل، مُقاد ولست القائد. تخلى عن قيادة حياتك.. له!

ولما تتصالح مع الروح وتبقى شبهه.. هاتعرف تسلك معاه في تناغم بسهوله Synergy ومش هانعرف ايه طالع منك وايه منه، لأنك صرت إنسان في الروح ❤️